மகாராஷ்டிர மாநிலம் யவத்மால் பகுதியில் புதிய ஸ்கூட்டர் வாங்கியபோது 2 வயது சிறுவன் ஒருவன் கொடுத்த ஸ்டைலான போஸ் இணையத்தில் பெரும் வரவேற்பைப் பெற்ற நிலையில், அவனது எதிர்கால படிப்புக்காக கல்விச் செலவு ஏற்பு செய்யப்படும் என ஷோரூம் உரிமையாளர் அறிவித்துள்ளார். கடந்த நவம்பர் 9-ம் தேதி உள்ளூர் ஷோரூமுக்கு புதிய வாகனம் வாங்கச் சென்ற தம்பதியினர், தங்களது 2 வயது மகன் ருத்ரான்ஷ் சிங் தாகூரை அழைத்துச் சென்றுள்ளனர்.
இணையத்தில் வைரலான வீடியோ மற்றும் கல்விச் செலவு ஏற்பு
புதிய ஸ்கூட்டர் முன்பு நின்ற அந்தச் சுட்டிப் பையன், பெரியவர்களைப் போல கண்களில் கூலிங் கிளாஸ் அணிந்து, பேண்ட் பாக்கெட்டில் கைகளை விட்டபடி செம ஸ்டைலாக போஸ் கொடுத்துள்ளான். இந்த அழகான தருணத்தை அவனது பெற்றோர் வீடியோவாக எடுத்து இன்ஸ்டாகிராமில் பதிவிட, அந்த வீடியோ இணையத்தில் வைரலாக பரவியது. இதுவரை 13.7 கோடிக்கும் அதிகமான பார்வைகளையும், 68 ஆயிரத்துக்கும் மேற்பட்ட கமென்ட்களையும் குவித்து இந்த வீடியோ சாதனை படைத்துள்ளது.
ஷோரூம் உரிமையாளரின் பாராட்டு
சிறுவனின் இந்த அபார புகழைக் கண்டு வியந்துபோன சாய் பாயிண்ட் ஹோண்டா ஷோரூம் உரிமையாளர் திலீப் போபடே பாட்டீல், சிறுவனையும் அவனது குடும்பத்தினரையும் மீண்டும் தனது ஷோரூமுக்கு வரவழைத்து கவுரவித்தார். மேலும், எல்கேஜி முதல் கல்லூரிப் பட்டப்படிப்பு வரை ருத்ரான்ஷின் ஒட்டுமொத்த கல்விச் செலவு ஏற்பு செய்யப்படும் என அவர் உறுதியளித்துள்ளார்.
மேலும் Viral Social செய்திகளை Pixel Tamil தளத்தில் படியுங்கள்.