கீர்த்தி சுரேஷ் விளக்கம் அளித்துள்ளதன் மூலம், இயக்குநர் மிஷ்கின் தொடர்பாக சமூக வலைதளங்களில் பரவி வந்த தேவையற்ற சர்ச்சைகளுக்கு முற்றுப்புள்ளி வைக்கப்பட்டுள்ளது. ‘சத்தியவான் சாவித்திரி’ திரைப்படத்தின் பத்திரிகையாளர் சந்திப்பின் போது நடந்த ஒரு சிறிய சம்பவத்தை வைத்து இணையத்தில் பல கருத்துகள் பரவிய நிலையில், அதற்கு அவர் தனது அதிகாரப்பூர்வ எக்ஸ் தளப் பக்கத்தில் தெளிவான பதிலை வழங்கியுள்ளார்.
பத்திரிகையாளர் சந்திப்பில் நடந்தது என்ன?
பிரவீன் இயக்கத்தில் உருவாகியுள்ள ‘சத்தியவான் சாவித்திரி’ திரைப்படத்தில் நடிகை கீர்த்தி சுரேஷ் கதாநாயகியாக நடித்துள்ளார். இவருடன் இயக்குநர் மிஷ்கின், நடிகை பிரிகிடா உள்ளிட்ட பலர் முக்கிய கதாபாத்திரங்களில் நடித்துள்ளனர். இத்திரைப்படம் நாளை திரையரங்குகளில் வெளியாகவுள்ள நிலையில், இதற்கான செய்தியாளர்கள் சந்திப்பு நேற்று நடைபெற்றது.
இந்த விழாவில் மிஷ்கின் மற்றும் கீர்த்தி சுரேஷ் ஆகியோர் அருகருகே அமர்ந்திருந்தனர். நிகழ்வின் போது பேசிய மிஷ்கின், கீர்த்தி சுரேஷின் நடிப்பைப் வெகுவாகப் பாராட்டினார். ‘டோரதி’ திரைப்படத்தில் சிறப்பான நடிப்பை வெளிப்படுத்தியதற்காக, கீர்த்திக்கு அவர் தங்க மோதிரம் ஒன்றை பரிசாக அளித்தார். மேலும், “இனி வரும் காலங்களில் கீர்த்தி சுரேஷை ‘நடிகையர் திலகம்’ என்று அழையுங்கள். அவர் அந்தப் பட்டத்திற்கு முழுத் தகுதியானவர். அவரது தலையில் நான் ‘நடிகையர் திலகம்’ என்ற வைரத்தை வைத்திருக்கிறேன்” என்றும் மிஷ்கின் நெகிழ்ச்சியுடன் குறிப்பிட்டார்.
சர்ச்சையை கிளப்பிய வீடியோவும் கீர்த்தி சுரேஷ் விளக்கமும்
மிஷ்கின் மேடையில் பேசிக் கொண்டிருந்தபோது, அவரது கை எதிர்பாராதவிதமாக கீர்த்தி சுரேஷின் காலில் பட்டது. உடனே கீர்த்தியும் அதை கவனித்து தனது கையை கொண்டு வந்தார், அதற்குள் மிஷ்கின் கையை விலக்கிக்கொண்டார். இந்த வீடியோ காட்சி சமூக வலைதளங்களில் வெளியாகி வைரலானது. இதைப்பார்த்த சிலர், மிஷ்கினின் தொடுகையை கீர்த்தி சுரேஷ் விரும்பவில்லை என்றும், அது அசௌகரியமான தொடுகை என்றும் இணையத்தில் காரசாரமாக விவாதிக்கத் தொடங்கினர்.
காலை முதலே இந்த செய்தி காட்டுத்தீ போல பரவிய நிலையில், நடிகை கீர்த்தி சுரேஷ் விளக்கம் அளித்து ஒரு பதிவை வெளியிட்டார். அதில் அவர் கூறியிருப்பதாவது:
- “முதலில், எனது முகத்தில் உங்களுக்கு எங்கே அசௌகரியம் தெரிந்தது? நாங்கள் இருவரும் தந்தை – மகள் போன்ற உறவை பகிர்ந்துகொள்கிறோம் என்று அவரும் நானும் கூறியது உங்கள் காதுகளில் விழவில்லையா?”
- “இரண்டாவதாக, ஒருவேளை நான் அசௌகரியமாக உணர்ந்ததாகவே வைத்துக்கொள்வோம். திரைப்படங்களில் நாங்கள் ஒருவரை ஒருவர் தொட்டுக்கொண்டு நடிக்கிறோம் என்பதால், பொது இடங்களிலும் அப்படிச் செய்யும்போது எனக்கு எந்தப் பிரச்சினையும் இருக்கக்கூடாது என்று சொல்கிறீர்களா?”
- “நீங்கள் சில விஷயங்களை சரியாகப் புரிந்துகொள்ள வேண்டியிருக்கிறது” என்று மிக அழுத்தமாகப் பதிலடி கொடுத்துள்ளார்.
திரைப்பயணமும் ‘சத்தியவான் சாவித்திரி’ எதிர்பார்ப்பும்
தமிழ் மற்றும் தெலுங்கு திரையுலகில் முன்னணி நடிகையாக வலம் வரும் கீர்த்தி சுரேஷ், சமீபகாலமாக கதாநாயகிக்கு முக்கியத்துவம் உள்ள கதைகளைத் தேர்ந்தெடுத்து நடித்து வருகிறார். அவரது நடிப்பில் சமீபத்தில் வெளிவந்த ‘டோரதி’ மற்றும் ‘ரிவால்வர் ரீட்டா’ ஆகிய படங்களில், ‘டோரதி’ திரைப்படம் நல்ல வரவேற்பைப் பெற்றது. அப்படத்தில் அவருக்குக் குறைவான நேரமே காட்சிகள் இருந்தாலும், கதையின் முக்கியத்துவம் கருதி நடித்ததற்காகப் பல தரப்பிலிருந்தும் பாராட்டுகளைப் பெற்றார்.
தொடர் வெற்றியை நோக்கி பயணிக்கும் கீர்த்தி சுரேஷிற்கு, நாளை திரைக்கு வரவிருக்கும் ‘சத்தியவான் சாவித்திரி’ திரைப்படம் மிக முக்கியமான ஒன்றாகக் கருதப்படுகிறது. அறிமுக இயக்குநர் பிரவீன் இயக்கியுள்ள இப்படத்தின் மீது ரசிகர்களிடையே பெரும் எதிர்பார்ப்பு நிலவி வருகிறது.
இதையும் படியுங்கள்: