திமுக சின்னம் உதய சூரியனுக்கு ஓட்டுப்போடச் சொன்ன தவெக விஜய்? வைரலாகும் வீடியோ- நடந்தது என்ன?
தவெக தலைவர் விஜய், தனது தேர்தல் பிரச்சாரத்தில் உதய சூரியனுக்கு ஓட்டுப் போடுங்கள் என்று பேசும் வீடியோ இணையத்தில் வைரலான நிலையில், அதன் உண்மைத் தன்மை குறித்து அறியலாம்.
வீடியோவில் இருப்பது என்ன?
”நான் சொல்லிக் கொள்வது ஒன்றே ஒன்றுதான். ஏப்ரல் 23ஆம் தேதி காலையில் பக்காவாக ரெடி ஆகி, வாக்காளர் அடையாள அட்டையை எடுத்துக் கொள்ளுங்கள். முதல் ஆளாக உங்கள் பூத்துக்குச் செல்லுங்கள்.
அங்கு உதய சூரியனுக்கு நேராக உள்ள பொத்தானை அழுத்துங்கள். உங்கள் வீட்டில் உள்ள ஒவ்வொருவரையும் அழைத்துச் செல்லுங்கள். வெளியூரில் இருப்பவராக இருந்தால், முன்கூட்டியே டிக்கெட் முன்பதிவு செய்து, ஊருக்குச் செல்லுங்கள். கண்டிப்பாக ஓட்டு போடுங்கள். இது ஒரு தலைமுறைக்கான தேர்தல்” என்று தவெக தலைவர் விஜய் பேசுவதாக வீடியோ ஒன்று வைரலானது.
தமிழக வெற்றிக் கழகம் என்னும் கட்சியை இரு ஆண்டுகளுக்கு முன்பு தொடங்கிய நடிகர் விஜய், 2026 சட்டமன்றத் தேர்தலில் 234 தொகுதிகளிலும் தனித்துக் களம் காண்கிறார். ஒவ்வொரு தேர்தலிலும் திமுகவுக்கும் தவெகவுக்கும்தான் போட்டி; தீய சக்தி திமுக என்று, ஆளும் திமுகவை சரமாரியாக விமர்சித்து வருகிறார்.
விஜய்யா, உதய சூரியன் சின்னத்துக்கு ஓட்டு போடச் சொல்கிறார்?
இந்த நிலையில், தவெக தலைவர் விஜயின் பேச்சு அடங்கிய வீடியோ பார்ப்போருக்கு அதிர்ச்சியை ஏற்படுத்தியது. என்ன? ஒவ்வொரு பேச்சிலும் திமுகவைக் கிழித்துத் தொங்கவிடும் விஜய்யா, உதய சூரியன் சின்னத்துக்கு ஓட்டு போடச் சொல்கிறார்? என்று கேள்வி எழுப்பப்பட்டது.
இந்த நிலையில் இந்த வீடியோ எடிட் செய்யப்பட்டது என்று தெரிய வந்துள்ளது. இதுகுறித்து தனியார் செய்தி உண்மைத் தன்மை சரிபார்ப்பகம் விளக்கம் அளித்துள்ளது.
அந்த எக்ஸ் பதிவில், ‘ஏப்ரல் 23 அன்று சென்று உதயசூரியனுக்கு நேரே உள்ள பட்டனை அழுத்தி ஓட்டு போடுங்கள்’ என தவெக தலைவர் விஜய் நேற்றைய (மார்ச் 30) பிரச்சாரத்தின்போது கூறியதாகக் கூறி பலரும் வீடியோ ஒன்றை பகிர்ந்து வருகின்றனர்.
எடிட் செய்து பரப்புவதா?
உண்மையான வீடியோவில் அவர் விசில் சின்னத்திற்கு வாக்களியுங்கள் என்றே கூறியிருப்பார். வீடியோவை எடிட் செய்து தவறாகப் பரப்பி வருகின்றனர்’’ என்று தனியார் செய்தி உண்மைத் தன்மை சரிபார்ப்பகம் தெரிவித்துள்ளது.
