பிரதமர் மோடியும், பாதுகாப்பு அமைச்சர் ராஜ்நாத் சிங்கும், தண்ணீர் பகிர்வை எல்லை தாண்டிய பயங்கரவாதத்துடன் தொடர்புபடுத்தியதன் மூலம், சிந்து நதி நீர் விவகாரத்தில் இந்தியா தனது கடுமையான நிலைப்பாட்டை தொடர்ந்து கடைபிடிக்கிறது.
சிந்து நதி நீர் ஒப்பந்தம் இடைநிறுத்தப்பட்டது தொடர்பாக இந்தியாவிற்கு புதிய எச்சரிக்கை விடுத்துள்ள பாகிஸ்தானின் பருவநிலை மாற்ற அமைச்சர் முசாதிக் மாலிக், “எங்கள் தண்ணீரை தொடுபவர்களின் கைகள் துண்டிக்கப்படும் என்று ஏற்கனவே அறிவிக்கப்பட்டுவிட்டது” என்று கூறியுள்ளார்.
ஏப்ரல் 22-ம் தேதி பஹல்காம் பயங்கரவாதத் தாக்குதலைத் தொடர்ந்து, பல ஆண்டுகள் பழமையான நீர் பகிர்வு ஒப்பந்தத்தை இந்தியா தொடர்ந்து நிறுத்தி வைத்துள்ள நிலையில், அவரது இந்த கருத்துக்கள் வெளிவந்துள்ளன. பாகிஸ்தானிய தொலைக்காட்சியான ARY நியூஸில் ஒளிபரப்பப்பட்ட மாலிக்கின் கருத்துக்கள் அடங்கிய காணொளி, அதன் பின்னர் சமூக ஊடகங்களில் பரவலாக பகிரப்பட்டு வருகிறது.
புது டெல்லி அதன் அமலாக்கத்தை நிறுத்தி வைத்ததிலிருந்து முக்கிய சர்ச்சைக்குரிய விஷயமாக நீடித்து வரும் சிந்து நதி நீர் ஒப்பந்தத்தின் எதிர்காலம் குறித்து, இரு நாடுகளுக்கும் இடையே நீடித்து வரும் வார்த்தைப் போரை இந்த சமீபத்திய கருத்துக்கள் மேலும் தீவிரப்படுத்துகின்றன.
விமர்சனங்களை தீவிரப்படுத்தும் பாகிஸ்தான் அமைச்சர்கள்
பாகிஸ்தானின் தகவல் துறை அமைச்சர் அத்தாவுல்லா தாரரும், பிரதமர் நரேந்திர மோடியின் பெயரை நேரடியாக குறிப்பிடாமல், இந்தியாவின் நிலைப்பாட்டை விமர்சித்தார். “அண்டை நாட்டுப் பிரதமரின் கட்டுப்பாட்டில் ஒரு குழாய் உள்ளது. பாகிஸ்தானுக்குள் ஒரு சொட்டுத் தண்ணீர் கூட பாய விடமாட்டேன் என்று அவர் கூறுகிறார்,” என தாரார் கூறியதாக டான் செய்தி வெளியிட்டுள்ளது.
சிந்து நதி நீர் ஒப்பந்தத்தை எந்தவொரு நாடும் தன்னிச்சையாக ரத்து செய்ய முடியாது என்று கூறிய அவர், அந்த ஒப்பந்தம் குறித்த இஸ்லாமாபாத்தின் நிலைப்பாட்டை மீண்டும் வலியுறுத்தினார்.
உறுதியாக இருக்கும் இந்தியா
பஹல்காம் பயங்கரவாதத் தாக்குதலைத் தொடர்ந்து, ஒப்பந்தத்தை இடைநிறுத்தம் செய்த தனது முடிவை இந்தியா பலமுறை நியாயப்படுத்தியுள்ளது. இருதரப்பு உறவுகள் குறித்த புது டெல்லியின் கடுமையான அணுகுமுறையை உணர்த்தும் வகையில், கடந்த ஆண்டு பிரதமர் நரேந்திர மோடி, “பயங்கரவாதமும் பேச்சுவார்த்தையும் ஒருங்கே செல்ல முடியாது; தண்ணீரும் ரத்தமும் ஒருங்கே ஓட முடியாது” என்று கூறினார்.
இந்தியாவிற்கு தனது நிலைப்பாட்டைத் தளர்த்தும் எண்ணம் இல்லை என்று கூறி, பாதுகாப்புத் துறை அமைச்சர் ராஜ்நாத் சிங் சமீபத்தில் அந்த நிலைப்பாட்டை மீண்டும் உறுதிப்படுத்தினார். ஒப்பந்தம் இடைநிறுத்தப்பட்டது குறித்து குறிப்பிடுகையில், “பஹல்காம் பயங்கரவாதத் தாக்குதலுக்குப் பிறகு, சிந்து நதி நீர் ஒப்பந்தத்தை இடைநிறுத்தியதன் மூலம், கண்ணீர் வற்றியவர்கள் எங்களிடமிருந்து தண்ணீரை எதிர்பார்க்கக் கூடாது என்று நாங்கள் கூறினோம். பயங்கரவாதிகளின் ஆதரவாளர்களுக்கும் மனிதகுலத்தின் எதிரிகளுக்கும் சிந்து நதியின் நீரை நாங்கள் சென்றடைய விடமாட்டோம்” என்று அவர் கூறியிருந்தார்.
தண்ணீர் பற்றாக்குறையால் தவிக்கும் பாகிஸ்தான்
நாடு முழுவதும் உள்ள முக்கிய விவசாயப் பகுதிகளை பாதித்து வரும் தண்ணீர் நெருக்கடியை பாகிஸ்தான் எதிர்கொண்டுள்ள நிலையில், இந்த ராஜதந்திர பிரச்னை எழுந்துள்ளது. டான் பத்திரிகையின்படி, சிந்து மற்றும் பலுசிஸ்தானின் சில பகுதிகளில் உள்ள மில்லியன் கணக்கான ஏக்கர் விவசாய நிலங்களுக்கு நீர் வழங்கும், சிந்து நதியின் மீது அமைந்துள்ள பாகிஸ்தானின் மிகப்பெரிய நீர்ப்பாசன அமைப்புகளில் ஒன்றான சுக்கூர் தடுப்பணையைச் சுற்றியுள்ள பகுதிகளில் நிலைமை குறிப்பாகக் கடுமையாக உள்ளது.
கால்வாய் நீர் பற்றாக்குறை அபாயகரமான நிலையை எட்டியுள்ளது. வடமேற்கு கால்வாயில் 64.1%, நெல் கால்வாயில் 38% மற்றும் தாது கால்வாயில் 82% பற்றாக்குறை பதிவாகியுள்ளது. இந்த பற்றாக்குறையால், பயிர் இழப்புகள், வாழ்வாதாரங்கள் மற்றும் பிராந்தியப் பொருளாதாரம் குறித்து கவலைகள் எழுந்துள்ளன.
தண்ணீர் பற்றாக்குறையானது, பாகிஸ்தானுக்குள் விநியோகம் தொடர்பான உள்நாட்டுப் பூசல்களுக்கும் வழிவகுத்துள்ளது. அறிக்கையின்படி, பஞ்சாப் தனக்கு ஒதுக்கப்பட்ட பங்கை விட அதிக நீரை எடுத்து வருவதாகவும், அதேவேளையில், கீழ்நிலைப் பகுதிகள் கடுமையான பற்றாக்குறையை தொடர்ந்து சந்தித்து வருவதாகவும் சிந்து மாகாண அதிகாரிகள் குற்றம் சாட்டியுள்ளனர்.
குறைந்துவரும் பாசன நீர் விநியோகம், பிராந்திய சர்ச்சைகள் மற்றும் சிந்து நதி நீர் ஒப்பந்தம் தொடர்பாக இந்தியாவுடன் நிலவும் தொடர் முரண்பாடு ஆகியவை, பாகிஸ்தானின் நீர் பாதுகாப்பு குறித்த கவலைகளை மேலும் தீவிரப்படுத்தியுள்ளது.
